– Til nytt regjeringskvartal ønskjer vi oss innervegger som gir god akustikk og som kan gjenbrukast. Dei lydabsorberande elementa skal vere ein integrert del av veggen, og ikkje noko som blir montert utanpå veggen, seier sjefarkitekt Synnøve Haugen i Statsbygg.

Det nye regjeringskvartalet skal ha fleksible løysingar slik at rominndelingar kan endrast etter talet på tilsette, oppgåvefordeling og ulike arbeidsformer. For å få til dette jaktar Statsbygg modulbaserte veggsystem.

Torsdag 17. september kl 13.00 held Statsbygg digitalt informasjonsmøte om idekonkurransen. Du kan følgje informasjonsmøtet her.

Honorar

Som ein del av prosjekteringa av arbeidsmiljøet i det nye regjeringskvartalet har det blitt utført simuleringar av lydforholda. Simuleringane viser at det er eit stort behov for lydabsorbentar på vegger.

– Dagens standardprodukt for flyttbare vegger er utforma slik at opning for både god akustikk og for gjenbruk er liten. Det ønskjer vi å gjere noko med gjennom denne idekonkurransen, fortel Haugen.

I første omgang skal interessentar og leverandørar søke om å delta i konkurransen. Dei som Statsbygg vel som deltakarar, får 200.000,- for å levere eit løysingsforslag innan 3. desember. Vinnaren får ytterlegare 300.000,- for å utvikle ein prototype av modellen.

Les heile utlysninga på Doffin.

Viktig element

Stortinget vedtok i 2018 at tre skal vere eit viktig element i det nye regjeringskvartalet, og at bygginga av regjeringskvartalet skal legge til rette for å bidra til innovasjon og utvikling hos norske leverandørar.

Klima- og miljødepartementet finansierer utviklinga av fem prosjekt innanfor sirkulærøkonomi. Eitt av desse er Statsbyggs idékonkurranse om akustiske trevegger i nytt regjeringskvartal.